Rannsókn og rókókó. Í átt að kvikmyndum.

Abstract

Á tíunda áratugnum hófu sífellt fleiri listamenn að nota og fjalla um kvikmyndaformið í verkum sínum. Tæknibreytingar í myndvörpun og þróun stafrænnar upptökutækni gerðu sýningarhald og vinnslu á myndefni aðgengilegri en áður hafði verið. Í þessari þróun hafa orðið til aðraðar kvikmyndir (othered cinema) þar sem kvikmyndir og vídeólist renna sífellt meira saman. Þróun vídeólistarinnar á Íslandi fór hægt af stað en á síðustu árum hafa komið fram listamenn sem nýta sér miðilinn á nýjan og skapandi hátt. Verkin Keep Frozen eftir Huldu Rós Guðnadóttur og Gestirnir (The Visitors) eftir Ragnar Kjartansson eru nýleg verk sem bæði eiga í samtali við kvikmyndahefðina. Þrátt fyrir afar ólíka nálgun nota báðir listamennirnir kvikmyndaformið til þess að auðga list sína.Í fyrsta kafla „Bylting vídeóvæðingarinnar“ verður upphaf og saga vídeólistarinnar skoðuð. Tæknilegar breytingar sem áhrif höfðu á miðilinn verða raktar. Þá verður kannað hvernig samruni kvikmynda og vídeólistar myndaði aðraðar kvikmyndir. Upphaf og hægfara þróun vídeólistar á Íslandi verður skoðað í „Engir miklir skjálistamenn á Íslandi?“. Fjallað verður um verk Ragnars Kjartanssonar Gestirnir í „Hreyfanlegt portett“ ásamt því að nokkur fyrri verka listamannsins verða könnuð með hliðsjón af aukinni notkun hans á kvikmyndaforminu. Formgerð verksins verður rannsökuð ásamt því hvernig Ragnar beitir kvikmyndatækni til þess að draga upp persónulegar myndir í Gestunum. Keep Frozen listrannsóknarverkefni Huldu Rósar verður rakið í „Frosthörkur“ og notkun listamannsins á hinum ýmsu miðlum í verkefninu skoðuð. Farið verður í það hvernig hefðbundnir þættir í heimildagerð eru nýttir á skapandi hátt til þess að fjalla um og rannsaka samtímann í heimildamyndinni Keep Frozen.