Breytingar í umhverfi endurskoðunar: Hlutverk endurskoðenda og áhrif gæða í endurskoðun

Abstract

Efni lokaverkefnisins er að skoða hlutverk endurskoðanda í virðiskeðju fjárhagslegra upplýsinga út frá þeim breytingum sem eru að verða á framsetningu áritana þeirra. Breytingarnar koma fram í nýjum og uppfærðum alþjóðlegum endurskoðunarstöðlum (e. International standards on Auditing, ISA ) og breytingum á 8. endurskoðunartilskipun Evrópusambandsins (ESB). Sérstaklega verður horft til nýrra viðmiða um endurskoðun á einingum tengdum almannahagsmunum (ETA) og nýrra ákvæða um svokölluð lykilendurskoðunaratriði (KAM). Áhrif þessara breytinga á umhverfi endurskoðunar eru skoðuð út frá hlutverki endurskoðenda og ábyrgðaraðila stjórnarhátta (ÁS) og lagt verður mat á það hvort þessar umbætur geta haft jákvæð áhrif á gæði endurskoðunar þessara félaga. Niðurstöður þessarar ritgerðar sýna að þessar breytingar munu auka virði árituninnar með meira gagnsæi á framkvæmd endurskoðunarinnar. Notendur munu fá meiri innsýn í vinnu endurskoðenda og hagsmunaaðilar fá fleiri og betri upplýsingar. Það er verið að taka mikilvægt skref til að auka formfestu í samskiptum aðila í keðju fjárhagslegra upplýsinga og gera þau skilvirkari með tilkomu lykilendurskoðunaratriða í áritun, bæði gagnvart endurskoðunarnefnd og notendum.