Áhrif rafræns umtals á traust og kaupáform í netverslun: Með sérstaka áherslu á Facebook og Youtube

Abstract

Markmið þessarar rannsóknar var að kanna áhrif rafræns umtals á samfélagsmiðlum á traust og kauphegðun neytenda í netverslunum. Sérstaklega var skoðað rafrænt umtal á samfélagsmiðlunum Facebook og Youtube þar sem þeir eru einir af vinsælustu samfélagsmiðlum heims í dag en eru samt sem áður frábrugðnir hvor öðrum.Framkvæmd var megindleg rannsókn þar sem þátttakendur voru spurðir fjölmargra spurninga varðandi traust, rafrænt umtal, netverslanir og kaupáform með áherslu á annað hvort Facebook, Youtube eða samfélagsmiðla yfir höfuð. Könnunin var send út í gegnum Facebook og voru 234 þátttakendur sem svöruðu henni. Helstu niðurstöður rannsóknarinnar bentu til þess að rafrænt umtal hafði áhrif á traust neytenda til netverslana, en þó voru áhrifin mismikil út frá hvort umtalið fór fram á Facebook eða Youtube og voru áhrifin töluvert sterkari frá Facebook. Rafrænt umtal hafði áhrif á kaupáform neytenda í gegnum netverslun og eftir því sem neytendur notuðu Facebook meira því líklegri voru þeir til þess að versla í gengum netverslun. Einnig kom í ljós að einstaklingar sem öfluðu sér upplýsinga á samfélagsmiðlum áður en verslað var í gegnum netverslun, urðu frekar fyrir áhrifum jákvæðs umtals á samfélagsmiðlum, sem ýtti svo undir kaupáform í netverslun.