Þróun Íslands sem flutningamiðja og efnahagsleg áhrif þess

Abstract

Flugrekstur á Íslandi er í miklum vexti og umsvif á Keflavíkurflugvelli hafa aukist mjög á undanförnum árum. Ekkert lát er á fjölgun farþega sem fara um flugvöllinn og fjöldi áfangastaða og tíðni flugferða hefur aldrei verið meiri. Leiðakerfi íslensku flugfélaganna byggir á því að nýta Keflavíkurflugvöll sem flutningamiðju og stækkun þess eykur úrval Íslendinga á beinu flugi til og frá landinu. Aukin umsvif á Keflavíkurflugvelli hafa því bætt flugsamgöngur hér á landi sem hlýtur að teljast dýrmætt fyrir svo landfræðilega einangraða þjóð eins og Íslendinga. Markmið þessarar ritgerðar er að meta stöðu og þróun Íslands sem flutningamiðja og að kanna hvaða efnahagslega þýðingu það hefur að hér byggist upp miðstöð flugs yfir Norður-Atlantshafið. Ætlunin er að kortleggja þá hagrænu krafta sem drífa myndun flutningamiðja og að leggja mat á áhrif þeirra á uppbyggingu Keflavíkurflugvallar sem tengihöfn. Fjallað verður um mikilvægi skiptifarþega við uppbyggingu flutningamiðja og kynntar tillögur um hvernig hámarka megi þjóðhagslegan ábata af Keflavíkurflugvelli sem áningarstað.