Samruni

Abstract

Náttúran og manneskjan, sín hvor einingin af sömu heild, eru í kappi við tímann. Frá upphafi þegar líf kviknar og land myndast ferðast hvor eining í gegnum röð ófyrirsjáanlegra ákvarðana og skilyrða. Á endanum stefnir allt að sama áfangastað: niðurbrot hefst og endalokin taka við. Með inngripinu er landið skorið í áfanga. Hver áfangi er hluti af leið er dregur manneskjuna nær jökli og á sama tíma hvetur til þátttöku í frávikum upphafs, hvíldar og niðurbrots. Upphafið sker sig niður í landið, jörðin umlykur manneskjuna sem gefst færi á að fræðast um svæðið. Þegar upp á yfirborðið er komið þá vísa fimm áfangar veginn og bjóða hvíld þar sem náttúran og auðnin eru í fyrirrúmi. Að lokum renna manneskjan og lónið saman í eitt og horfast í augu við niðurbrot jökuls.