Líkaðu, deildu, komdu í áskrift : hvernig gæti YouTube gagnast óperusöngvurum?

Abstract

Af öllu því efni sem fer eins og eldur í sinu um internetið eru óperumyndbönd sjaldan í þeim flokki. Einstaklingar út um allan heim veita innsýn í sitt daglega líf og fá e.t.v. 50.000 til 100.000 áhorf fyrsta sólarhringinn á hvert myndband á meðan óperusöngkona sem hefur verið virk í 6 ár er ekki einu sinni með milljón heildaráhorfa á sinni rás. Óperan er deyjandi listform vilja sumir meina en aðrir reyna að leita leiða til að nútímavæða hana og gera hana spennandi. Þátttökumenningin sem gerir YouTube að þeim sérstaka miðli sem hann er virðist ekki ná að festa sig í sessi innan óperuheimsins en þó eru þar aðilar sem eru einlægir og persónulegir í framkomu sinni á samfélagsmiðlum. Líklega hafa farsælir óperusöngvarar nóg að gera á sínu sviði og hafa ekki þörf fyrir að vera eins virkir persónulega á netinu og þeir sem eru minna þekktir. Áhugavert væri samt sem áður að fylgjast með einstaklingi sem væri styttra kominn en gæfi okkur innsýn inn í óperuheiminn frá sínu sjónarhorni með hjálp netmiðla.