Sviksemi orðanna : orð í list, orð sem list

Abstract

Þessi ritgerð fjallar um mikilvægi orða til tjáskipta í listrænu og samfélagslegu ljósi. Ég skoða samband orða og mynda í myndlist út frá hugmyndum Simons Morley, sem greindi listaverk sem eiga í sambandi við orð í fjóra meginflokka: trans-medial, multi-medial, mixed-media og inter-medial.Myndir á samfélagsmiðlum sem hafa orð til stuðnings koma við sögu sem og fagurfræði mynda sem finnast þar. Skilaboð til almennings úr auglýsingum og poppmenningu eru skoðuð í ljósi upplýsingamiðlunar og samhengið á milli hugmynda Morleys og listaverka höfundar er kannað og flokkað.Þá fjalla ég um listamenn sem nota orð í myndverkum sínum eins og René Magritte, David Shrigley, Lawrence Weiner og Ed Ruscha og skoða verk þeirra út frá kenningum Morleys. Áhrifa frá Magritte gætir víða enn í dag tæpri öld frá hápunkti ferils hans. Orðin virðast halda velli. Að lokum varpa ég fram spurningum um tengsl ljóða Gyrðis Elíassonar við myndlistarverk sem styðjast við orð.