Innleiðing viðskiptagreindarlausnar hjá Stjórnarráði Íslands

Abstract

Ritgerðin byggir á tilviksrannsókn (e. case study) á innleiðingu viðskiptagreindarlausnar hjá Stjórnarráði Íslands. Tilgangur rannsóknarinnar var að fá innsýn í hvernig staðið er að vali á viðskiptagreindarlausn hjá stórri, flókinni, opinberri skipulagsheild í íslensku umhverfi. Skoðað var hvers vegna ákveðið var að ráðast í verkefnið. Fylgst var með starfi vinnuhóps Stjórnarráðsins um innleiðingu viðskiptagreindarlausnar. Aðferðir og ferli vinnuhópsins var borið saman við almenn fræði á sviði upplýsingatækni. Markmið innleiðingar viðskiptagreindarlausnar er að auka notkun tölulegra upplýsinga innan og utan Stjórnarráðsins, bæta gæði gagna og hafa þau aðgengileg á einum stað. Með þessu opnast einnig möguleikar á aukinni upplýsingagjöf frá hinu opinbera og stuðlar þannig að gagnsæi og betri ákvörðunum fyrir samfélagið. Niðurstaða rannsóknarinnar er sú að viðskiptagreindarlausn geti verið öflugt tæki fyrir Stjórnarráðið til þess að ná markmiðunum sem um var getið hér að framan. Þá er fjallað um stöðu og áskoranir innleiðingar viðskiptagreindarlausnar hjá Stjórnarráðinu og sett fram sýn um hverju verkefnið getur áorkað ef vel tekst til að fimm árum liðnum.