Hraða- og styrktarþjálfun knattspyrnumanna

Abstract

Í knattspyrnu eru miklar kröfur gerðar til líkamlegs atgerfis eins og úthalds, styrks og hraða. Hins vegar eru margir þjálfarar og knattspyrnumenn sem einblína einungis á úthaldsþjálfun og líta framhjá hinum þáttunum, styrk og hraða. Nútímaknattspyrna er orðin hraðari en áður og fyrir knattspyrnumenn, til að standast það álag sem fylgir hverjum knattspyrnuleik, skiptir líkamlegur styrkur miklu máli. Ef knattspyrnumenn ætla að ná hámarksárangri inni á vellinum verða þeir að vera vel þjálfaðir í þessum þáttum því ef þeir eru þjálfaðir rétt hafa þeir meiri möguleika á því að vinna mótstöðubaráttu við andstæðinginn, vera betri í tæklingum, hoppa hærra, hlaupa hraðar, bregðast fyrr við, forðast þreytu og einnig að komið í veg fyrir meiðsli. En hvernig geta knattspyrnumenn náð mestum mögulega hraða og styrk svo þeir nái hámarksárangri inni á vellinum? Samkvæmt mörgum rannsóknum ætti styrktarþjálfunin að einblína á það að styrkja þá vöðva og vöðvahópa sem ná yfir nokkur liðamót í einu án þess að auka líkamsþyngd knattspyrnumanna. Skipta ætti hraðaþjálfun niður í fjóra meginþætti og ættu knattspyrnumenn að þjálfa alla þessa þætti saman til að ná sem mestum mögulega hraða. Í þessari ritgerð mun höfundur fjalla nánar um þessa þætti og setja fram nokkur dæmi um æfingar. Einnig er markmið þessarar ritgerðar að gefa öðrum þjálfurum yfirsýn yfir það hvernig gott er að haga hraða- og styrktarþjálfun svo leikmenn þeirra nái mestum mögulega hraða og styrk.