„Það er þar sem sjálfstraustið kemur“ : rannsókn á myndun sjálfsmyndar barna í útinámi

Abstract

Rannsóknarritgerð þessi er lokaverkefni til BA – gráðu í Tómstunda- og félagsmálafræði við Háskóla Íslands. Gerð var eigindleg rannsókn og var markmiðið með henni að leita eftir því hvort að útinám hafi jákvæð áhrif á myndun sjálfsmyndar hjá ungum börnum. Rannsóknarvettvangurinn var leikskólinn Álfheimar á Selfossi, en sá leikskóli hefur aflað sér mikillar reynslu á sviði útináms. Gerð var athugun á leikskólanum þar sem fylgst var með fjórum börnum bæði inni og úti í leik en einnig voru tekin viðtöl við fjóra starfsmenn. Fræðilegur bakgrunnur ritgerðarinnar byggir á kenningum Dewey, Vygotsky og Piaget, en jafnframt skilgreiningum á þeim hugtökum sem unnið er með eins og útinám, reynslumiðað nám, ígrundun og sjálfsmynd. Rannsóknarspurningin ritgerðarinnar er: Hefur útinám jákvæð áhrif á myndun sjálfsmyndar ungra barna? Niðurstöður rannsóknarinnar leiddu í ljós að það eru ákveðnar vísbendingar um að útinámið hafi jákvæð áhrif á myndun sjálfsmyndar hjá ungum börnum. Þar sem að athugun leiddi í ljós að sjálfsálit, sjálfsöryggi og trúin á eigin getu var mun meiri hjá börnunum í útináminu heldur en inni. Einnig studdu viðtöl við starfsmenn þær niðurstöður. Niðurstöðurnar gefa, vonandi þeim sem vinna að öflugu útinámi barna, byr undir báða vængi, í að halda þeirri vinnu áfram.