Sjálfsmynd unglinga : tengsl félagslegra þátta og áhættuhegðunar

Abstract

Í þessari ritgerð verður fjallað um tengsl félagslegra þátta og áhættuhegðunar við sjálfsmynd unglinga. Mikil sjálfsmyndarleit fer fram á unglingsárunum þar sem unglingar reyna að finna út hverjir þeir eru. Á þessu tímabili eru unglingar viðkvæmir fyrir áhrifum annarra og eru margir þættir sem hafa áhrif á mótun sjálfsmyndarinnar. Á unglingsárunum fara fram miklar breytingar sem geta reynst ungmennum erfiðar, þar á meðal þroskabreytingar og byrjun kynþroskaskeiðsins. Jafningjar fara að vega meira í lífi unglinga og álit þeirra skiptir miklu máli. Foreldrar, skóli, vinir og jafningjar eru allt félagslegir þættir sem eru nátengdir unglingum og hafa þeir allir einhver áhrif á sjálfsmynd þeirra. Það er því mikilvægt að þessir félagslegu þættir hafi jákvæð áhrif á sjálfsmynd unglinga frekar en neikvæð. Áhættuhegðun er hegðun sem er líkleg til að aukast á unglingsárunum. Sjálfsmyndin skiptir miklu máli þegar kemur að áhættuhegðun unglinga. Þeir unglingar sem hafa neikvæða sjálfsmynd eru líklegri til þess að leiðast út í áhættusama hegðun heldur en unglingar sem hafa jákvæða sjálfsmynd. Annar þáttur sem hefur mikil áhrif á líf unglinga og sjálfsmynd þeirra í samfélaginu í dag eru samfélagsmiðlar. Í dag eyða unglingar mun meiri tíma á samfélagsmiðlum en áður. Stúlkur eru líklegri en strákar til að deila efni með öðrum á samfélagsmiðlum og þar af leiðandi er líklegra að samfélagsmiðlar hafi meiri áhrif á sjálfsmynd þeirra. Í ritgerðinni verður því leitast við að skoða hvaða félagslegu þættir hafa áhrif á sjálfsmynd unglinga og hver tengsl sjálfsmyndar séu við áhættuhegðun þeirra.