Ég negli og saga... : verkefnasafn í hönnun og smíði fyrir 1. og 2. bekk

Abstract

Viðfangsefni þetta er lokaverkefni höfundar til B.Ed prófs í grunnskólakennslu við menntavísindasvið Háskóla Íslands. Verkið samanstendur af greinargerð og verkefnasafni fyrir 1. og 2. bekk í námsgreininni hönnun og smíði. Verkefnasafninu er ætlað að efla lausnamiðaða hugsun nemenda og stuðla að sjálfstæðum vinnubrögðum þeirra í gegnum ferlið frá hugmynd til lokaafurðar. Verkefnin falla að hæfniviðmiðum Aðalnámskrár grunnskóla fyrir hönnun og smíði á yngsta stigi námsins. Í greinargerðinni er fyrst fjallað um hugmyndafræði verklegrar þjálfunar og upphaf og þróun smíðakennslu í íslenskum grunnskólum. Þá er fjallað um þátt hönnunar- og smíðakennslu í Aðalnámskrá grunnskóla og gert grein fyrir námskenningum sem gætu stutt við kennslu ungra barna í hönnun og smíði. Að lokum eru gefnar leiðbeiningar um notkun verkefnasafnsins og ráðleggingar til kennara. Verkefnasafnið byggir á þrettán verkefnum og inniheldur jafnframt kafla um hönnun, innlagnir verkefna og námsmat.