Gagnkynhneigt forræði : hinsegin mæður frá aðlögun til usla

Abstract

Markmið rannsóknarinnar er að varpa ljósi á hvernig sjö hinsegin konur takast á við gagnkynhneigð viðmið í uppeldi barna sinna. Aðal rannsóknarspurningin er: Hvernig lýsa sjö hinsegin mæður reynslu sinni af því að takast á við gagnkynhneigt forræði í uppeldi barna sinna? Mótunarhyggjukenningar um síðtímafjölskyldur (e. post-modern families) og kenningar Butler (1993, 2006) um gjörning (e. performativity) eru leiðarljós í verkinu ásamt útfærslu Paechter (2007) á iðjukenningu Lave og Wenger og hugmyndum Bekrowitz og Ryan (2011) um það hvernig hinsegin fólk ögrar gagnkynhneigðum viðmiðum í uppeldi barna sinna.Tekin voru hálfopin viðtöl við sjö hinsegin konur. Auglýst var eftir þátttakendum á Facebook, fjórar kvennanna svöruðu auglýsingunni en í kjölfar hennar fékk rannsakandi ábendingar um hinar þrjár. Viðtölin voru hljóðrituð og afrituð. Viðtölin voru greind út frá fyrirbærafræði.Niðurstöðurnar leiddu í ljós að flestar konurnar sem tóku þátt í rannsókninni töldu sig hafa orðið fyrir áhrifum gagnkynhneigðs forræðis í lífi sínu og að það hefði áhrif á hvernig þær ala börn sín upp. Þær fara þrjár mismunandi leiðir í uppeldi barnanna; styðja við gagnkynhneigt forræði, brjóta það upp eða fara bil beggja. Tvær kvennanna aðlaga sig að gagnkynhneigða forræðinu. Ein reynir að berjast gegn því en flækist í neti þess en hinar eru gagnrýnar á kynjakerfið og gagnkynhneigt forræði. Þær skapa usla í viðteknum venjum og bjóða börnum sínum upp á sveigjanlegt kyngervi. Uslinn sem konurnar beita er ekki átakalaus og glíma konurnar við aðfinnslur utanaðkomandi fólks sem skapa efasemdir um leiðirnar sem þær hafa ákveðið að fara í uppeldinu.