„Ég var tilbúin að fórna öllu fyrir hana, samt var hún ekki mín“ : hlutverk og reynsla stjúpmæðra og birtingarmyndir á íslenskum vefmiðlum

Abstract

Þessi ritgerð er lokaverkefni höfunda til BA prófs í uppeldis- og menntunarfræði við Háskóla Íslands. Tilgangur ritgerðarinnar er að varpa ljósi á upplifun og reynslu stjúpmæðra sem sendu reynslusögur sínar inn á vefmiðlana Bleikt.is og Hún.is. Stjúpmóðurhlutverkið hefur verið talið eitt erfiðasta hlutverk sem konur taka sér fyrir hendur. Rannsóknir sýna að stjúpmæður upplifa fordóma og þrýsting um að standa sig fullkomlega, jafnt frá samfélaginu og þeim sjálfum. Því voru reynslusögur stjúpmæðranna á vefmiðlunum greindar með tilliti til þess sem fyrrnefndar rannsóknir hafa sýnt fram á. Auk þess var skoðað hvaða leiðir hafa reynst stjúpmæðrum vel til þess að mynda gott samband við stjúpbörn sín. Niðurstöðurnar eru þær að stjúpmæðurnar hafa ólíka reynslu af hlutverki sínu. Samskipti við maka, stjúpbörn og kynmæður barnanna geta verið strembin og þrýstingur á stjúpmæður um að standa sig er mikill. Þó getur stjúpmóðurhlutverkið verið ánægjulegt og gefandi, sérstaklega ef allir aðilar einbeita sér að góðum samskiptum og velferð barnanna.