Hvað þarf starfsfólk að hafa í huga þegar einhverfur unglingur mætir í félagsmiðstöð?

Abstract

Starf félagsmiðstöðva verður sífellt mikilvægara í lífi margra unglinga. Þar er unnið markvisst með þætti eins og sjálfsmynd, samskipti, félagsfærni og þátttöku og er starfið því sérstaklega mikilvægt fyrir þá unglinga sem standa höllum fæti félagslega. Einhverfir unglingar eiga oft erfitt uppdráttar félagslega vegna skertrar færni í félagslegum samskiptum, og getur því félagsmiðstöðvastarf hentað þeim hópi þegar kemur að því að skipuleggja frítímann sinn. Starfsfólk félagsmiðstöðva er sérhæft í að vinna með unglingum en í ritgerðinni er skoðað hvort starfsfólk þurfi sérhæfðar upplýsingar þegar kemur að því að taka á móti einhverfum unglingum. Í fræðilegum hluta ritgerðarinnar er unglingsárunum gerð góð skil, skoðaður er fræðilegur bakgrunnur félagmiðstöðva sem og leiðarljós og færniþættir. Einnig er fjallað um einhverfu, með sérstakri áherslu á félagsfærni. Í niðurstöðukaflanum er rannsóknarspurningu ritgerðarinnar svarað: „Hvað þarf félagsmiðstöðvastarfsmaður að hafa í huga þegar einhverfur unglingur mætir í félagsmiðstöð?“.