Um ruglingshættu lyfjavörumerkja

Abstract

Vörumerkjaréttur heyrir til hugverkaréttarins líkt og einkaleyfa-, höfunda- og hönnunarréttur. Þessi réttindi njóta verndar eignaréttarákvæðis stjórnarskrárinnar og veita eigendum einkarétt til notkunar í atvinnurekstri, sbr. fyrri málslið 1. gr. laga nr. 45/1997 um vörumerki (vml.). Í þessari ritgerð var sjónum beint að þeirri meginreglu vörumerkjaréttarins að tvö (eða fleiri) vörumerki skuli ekki vera svo lík að á þeim verði villst, sbr. 4. gr. vml. og kannað hvað er lagt til grundvallar þegar ruglingshætta lyfjavörumerkja er metin. Áhersla var lögð á að grafast fyrir um hvort sérstakar reglur eða sjónarmið gildi þegar lyfjavörumerki eiga í hlut. Athugaðir voru allir aðgengilegir úrskurðir Áfrýjunarnefndar hugverkaréttinda á sviði iðnaðar (ÁFN) þar sem lyfjavörumerki komu við sögu. Jafnframt var könnuð dómaframkvæmd hérlendis í lyfjamerkjamálum og einnig gerð grein fyrir lykildómum er tengjast vörumerkjum í umfjöllun Evrópudómstólsins. Í ritgerðinni er fjallað um það hvernig lyf eru nefnd og alþjóðlegar reglur í því sambandi, en nauðsynlegt er að glöggva sig nokkuð á slíkum reglum vegna umfjöllunarefnisins. Hryggjarstykki ritgerðarinnar felst í umfjöllun um úrskurði ÁFN, dóma Hæstaréttar og Evrópudómstólsins. Gerð er grein fyrir þeim sjónarmiðum sem lögð eru til grundvallar við mat á ruglingshættu vörumerkja almennt og lyfjavörumerkja sér¬staklega. Að lokum eru niðurstöður dregnar saman ásamt umfjöllun um þær.Það sem helst greinir mat á ruglingshættu lyfjavörumerkja frá mati á vörumerkjum sem eru það ekki er athugun forskeyta og hvort finna megi þau eða aðra hluta merkjanna í lyfjaskrám hér á landi og/eða erlendis. Einnig er markhópurinn frábrugðinn því sem almennt gerist, þ.e. bæði sérfræðingar og hinn almenni neytandi og stundum er einnig lagt út af efnafræðiheitum eða öðrum alþjóðlegum heitum við mat á ruglingshættu lyfjamerkja.