Vændi - val eða þvingun?: Upplifun, vald og undirskipun kvenna í vændis- og kynlífsiðnaðinum

Abstract

Er kynlífsvinna kvenna val eða þvingun? Sú tvískipting sem felst í þessari spurningu hefur lengi verið uppspretta rökræðna. Skipting á milli vændis og kynlífsiðnaðarins, atbeina og fórnarlamba og vals og þvingunar einkenna þessar rökræður. Líf vændiskvenna, það er sá hluti lífs þeirra sem tengist vændinu, er litað af ójöfnum valdastrúktúr í samfélaginu sem endurspeglar undirgefni vændiskvenna og yfirráð kúnnans. Í þessari ritgerð verður fjallað um tvískiptinguna á milli vals og þvingunar í lífi vændiskvenna. Farið verður yfir kenningarramma tengdum yfirráðum og undirgefni, líkama kvenna, valds og samfellu. Lagður verður grunnur með því að fara yfir sögu vændis og rökræðna um tvískiptingu innan heims vændis og kynlífsiðnaðarins. Þá verður fjallað um hvernig val og þvingun birtist í lífi vændiskvenna. Fjölmargar rannsóknir eru bornar saman sem varpa ljósi á hvernig upplifun vændiskvenna að vali og þvingun er mismunandi en þó tengd með ólíkum atburðum. Valdastrúktúr í lífi vændiskvenna bendir til þess að ólíkir, en þó tengdir atburðir, móti sýn vændiskvenna á vali og þvingun. Niðurstöður athugunar minnar sýna fram á að líf vændiskvenna litast af ójöfnum valdasamböndum þar sem þær eru undirskipaðar. Þær hafa samt sem áður atbeina þar sem upplifun þeirra skiptir höfuðmáli. Sýn þeirra á því hvort þær séu í vændi fyrir tilkomu vals eða þvingunar litast af ólíkum atburðum. Ekki er hægt að skipta vali og þvingun í tvo ólíka póla. Val og þvingun mynda samfellu eða flæði sem þarf að skilja út frá upplifun vændiskvennanna sjálfra.