Kynjaímyndir og karlaveldi: Ímyndarvinna og endursköpun veiðitímarits.

Abstract

Greinargerð þessi er annar hluti lokaverkefnis í hagnýtri menningarmiðlun frá Háskóla Íslands. Hinn hlutinn er fjögur tölublöð Sportveiðiblaðsins sem var endurskapað í tilefni af þrjátíu ára afmælisútgáfuári tímaritsins.Greinargerðin lýsir því ferli sem fylgir endursköpun Sportveiðiblaðsins og þeim vandkvæðum sem fylgja því að breyta útgáfu tímarits í rótgrónu karla­umhverfi. Fjallað verður um hugmyndir sem stuðst var við og aðstæður sem urðu til í ferlinu. Eins verður rýnt í það markaðsumhverfi sem blasir við í útgáfu smærri tímarita og hindranirnar sem þarf að yfirstíga.Sagt verður frá tilraunum þeim sem gerðar voru til að reyna að breikka markhópinn og auka hlut kvenna og fjölskyldufólks í blaðinu. Ég velti fyrir mér kynjaímyndum í gegnum tíðina, hlutverki konunnar og karlmannsins, þá sérstaklega tengt veiðimenningu í fortíð og nútíð. Vinna var lögð í að greina markhópana í þrjá flokka og skipuleggja efnistök þannig að þau höfðuðu ríkulega til þeirra hópa sem Sportveiðiblaðið vildi leggja mesta áherslu á og reyna á þann hátt að fjölga lesendum tímaritsins. Eins verður farið yfir þá þætti sem var breytt í þeim tilgangi að birta jákvæða og ábyrga mynd af veiðimönnum og á þann hátt að gera tímaritið að góðri fyrirmynd veiðimanna. Farið verður í þær breytingar sem gerðar voru á blaðinu útlitslega og efnislega, hugsunina á bak við þær og dæmi þeim tengd skoðuð.