Eve Online: Leikir, sköpun og samfélög

Abstract

Ritgerð þessi fjallar um samfélag spilara í tölvuleiknum Eve Online og hvernig þeir taka þátt í að skapa þennan ímyndaða heim sinn. Fjallað er um hvort og hvernig fjölþátttökutölvuleikir eins og Eve Online passa við eldri kenningar leikjafræðinga. Einnig var spurt hvort slíkir tölvuleikir geti yfirhöfuð talist rannsóknarefni þjóðfræðinga. Rannsóknin fór fyrst og fremst fram með viðtölum við spilara og starfsmenn töluvleikjafyrirtækisins CCP. Þó var einnig framkvæmd vettvangsathugun og tjáningar spilara á þar til gerðum spjallborðum voru skoðaðar. Helstu niðurstöður ritgerðarinnar eru að fjölþátttökutölvuleikir séu verðugt rannsóknarefni fyrir þjóðfræðinga. Einnig að kenningar flestra leikjafræðinga geti passað við þessa nýju tegund leikja þó umgjörð þeirra sé töluvert öðruvísi en eldri leikjategunda. Um leið kom í ljós að spilarar Eve Online taka mikinn þátt í að móta leikjaheim sinn með því að mynda hópa, búa til sögur í ýmsum myndum og síðast en ekki síst með því að skapa þær persónur sem byggja heiminn.