Kennsla í sjónlistum : hugmyndabanki á vef fyrir listgreinakennara

Abstract

Þetta er 30 eininga (ECTS) lokaverkefni til M.Ed.-prófs í grunnskólakennarafræði á Menntavísindasviði Háskóla Íslands. Verkefnið er tvíþætt og felst annars vegar í hönnun og gerð hugmyndabanka á vef fyrir listgreinakennara og aðra kennara sem fást við skapandi viðfangsefni til að leita í eftir hugmyndum að fjölbreyttum verkefnum í sjónlistum fyrir íslenska grunnskólanemendur (20 ECTS-einingar). Hins vegar fylgir hugmyndabankanum greinargerð þar sem verkinu og hugmyndum að baki því er lýst (10 ECTS-einingar). Verkefnin í hugmyndabankanum eru fjölbreytt og leitast er við að lýsa þeim á aðgengilegan hátt með því að leggja fram kennsluhugmyndir í einföldum dráttum ásamt viðmiðum um aldur nemenda, umfang í tíma, nálgun eða aðferðir og heppilegan efnivið. Þannig er lögð fyrir kennara kennsluhugmynd eða einföld kennsluáætlun fyrir hvert og eitt verkefni og þau sniðin að nemendum í 1.-10. bekk grunnskólanna.Í námi höfundar í faggreinakennslu með áherslu á myndmennt fór hann að finna fyrir skorti á námsefni að leita í við gerð kennsluáætlana í vettvangsnámi. Hann fór því að búa til sitt eigið kennsluefni byggt á ýmsum hugmyndum af netinu. Eftir þrjú ár í náminu með reglulegu vettvangsnámi sátu eftir ógrynni kennsluáætlana sem höfundur hafði búið til. Því kom upp sú hugmynd að útbúa efnisvef sem gæti verið hugmyndabanki fyrir listgreinakennara í leit að verkefnum fyrir nemendur að notast við í kennslu og auðvelda með því vinnu kennaranna við undirbúning kennslustunda og gerð kennsluáætlana.