Lagahugtakið á þjóðveldisöld. Viðhorf til laga og lagasetningar í íslenska þjóðveldinu

Abstract

Markmið þessarar ritgerðar er að fjalla um hugmyndir manna á þjóðveldistímanum um lög og lagasetningu og varpa þannig ljósi á lagahugtakið á þjóðveldisöld. Hvaða skilning menn lögðu í hugtakið lög, hvernig þau voru leidd í ljós og varðveitt og hvernig nýjar reglur komust inn í réttarkerfi þjóðveldisins. Það er grundvallaratriði í allri umfjöllun um íslenska þjóðveldið og lög þess að átta sig á þessum hugmyndum og því um að ræða mikilvæga forsendu skilnings á réttarsögu Íslands. Jafnframt er mikilvægt fyrir þá sem leggja stund á lögfræði nútímans að skilja fortíðina og rætur þeirra reglna sem gilda í dag. Stuðst verður við rannsóknir innlendra og erlendra fræðimanna á þessu sviði og tilraun gerð til að draga upp heildstæða mynd af viðfangsefninu.