Afturköllun tilboða. Er svigrúm til afturköllunar munnlegra tilboða rýmra en skriflegra?

Abstract

Viðfangsefni þessarar ritgerðar er afturköllun tilboða og verður þá fjallað um hvort svigrúm til afturköllunar munnlegra tilboða sé rýmra en skriflegra. Til að byrja með verður gerð grein fyrir helstu meginreglum samningaréttar er snúa að skuldbindingargildi samninga, samningsfrelsi og formi samninga. Þar verður fjallað nánar um þær reglur að samninga skuli halda og efna, að aðilum sé frjálst að ákvarða efni samnings og að lokum þá reglu að munnlegir samningar jafngildi skriflegum. Einnig verður litið til helstu undantekninga frá þessum meginreglum.Eftir að gerð hefur verið grein fyrir helstu meginreglum samningaréttar verður litið til nokkurra grundvallarhugtaka samningaréttarins. Fyrst verður fjallað um hugtökin loforð og ákvöð og réttaráhrif þeirra. Þar á eftir verður fjallað um hugtökin tilboð, samþykki og samningur og hvernig þessi hugtök fléttast saman við gerð samninga.Loks verður tekið fyrir meginefni þessarar ritgerðar - afturköllun. Þar verður byrjað á umfjöllun um afturköllun loforða og ákvaða og hver helstu skilyrði afturköllunar eru í þeim tilvikum. Að því loknu verður litið til afturköllunar tilboða en þar verður byrjað á því að skoða 7. gr. laga nr. 7/1936 um samningsgerð, umboð og ógilda löggerninga en það ákvæði fjallar um afturköllun tilboða. Að lokum verður afturköllun skriflegra og munnlegra tilboða gerð skil og fjallað um slíka afturköllun með hliðsjón af ritgerðaspurningu þessarar ritgerðar.