Ofbeldi í nánum samböndum: Með tilliti til ungmenna, sjálfsmyndar og samfélagsmiðla

Abstract

Ofbeldi í nánum samböndum er orðið verulegt vandamál um allan heim og hefur það áhrif á heilsu og velferð hjá körlum, konum og börnum. Þetta vandamál á sér stað án tillits til kyns, aldurs, trúarbragða og þjóðernis. Tíðni ofbeldis í nánum samböndum er hærri hjá ungum einstaklingum heldur en hjá fullorðnum og hefur það því áhrif á ungmenni um allan heim í dag. Breytingar á persónuleika og sjálfsmynd eru mestar á tímum unglingsárana til ungs fullorðinsára og eru náin sambönd talin vera lykilatriði þegar kemur að sjálfsmynd þeirra og gegna því mikilvægu hlutverki í lífi ungmenna. Ofbeldi í ungum parasamböndum er því alvarlegt vandamál þar sem afleiðingar þess geta haft áhrif á sjálfsmynd, sjálfsálit og sjálfsvirðingu sem er að þróast. Þolendur ofbeldis geta farið að týna sjálfum sér og getur þetta ýtt undir ýmsa áhættuhegðun meðal ungmenna. Afleiðingar ofbeldis í ungum parasamböndum getur haft bæði skammtíma og langtíma áhrif á þolendur sem jafnvel geta varið alla ævi og haft áhrif á komandi kynslóðir.Helstu niðurstöður eru að ofbeldi í nánum samböndum er í grundvallatatriðum ofbeldi af núverandi eða fyrrverandi maka og eru birtingarmyndir þess líkamlegt, andlegt, fjárhagslegt og/eða kynferðislegt ofbeldi. Sjálfsmynd einstaklinga er í mestri þróun á unglingsárunum og getur ofbeldi í ungum parasamböndum og samfélagsmiðlar haft áhrif á neikvæð áhrif á mótun hennar. Félagsráðgjafar á þessum vettvangi eru því mikilvægir bæði fyrir stuðning, ráðgjöf, forvarnir og fræðslu fyrir ungmenni sem verða þolendur ofbeldis í nánum samböndum.