Áhrif vímuefnaröskunar og heimilisofbeldis á börn

Abstract

Í þessari heimildarritgerð verður fjallað um áhrif vímuefnaröskunar og heimilisofbeldis á börn. Markmiðið með þessari ritgerð er að skoða hvort tengsl séu á milli ofneyslu áfengis og/eða vímuefna og heimilisofbeldis, hvaða afleiðingar það hefur á börn að upplifa heimilisofbeldi og hvaða úrræði eru í boði fyrir börn sem hafa upplifað heimilisofbeldi. Einnig verður skoðað hvernig aðkomu félagsráðgjafa í málum barna sem búa við vímuefnaneyslu og heimilisofbeldi sé háttað. Niðurstöður ritgerðarinnar sýndu fram á það að það eru sterk tengsl milli ofneyslu áfengis og/eða vímuefna og heimilisofbeldis. Heimilisofbeldi er alþjóðlegt vandamál sem á sér stað í nánum samböndum og oftar en ekki eru konur þolendur. Börn sem upplifa heimilisofbeldi eða verða vitni að því þurfa að kljást við slæmar afleiðingar í kjölfarið á ofbeldinu. Afleiðingar heimilisofbeldis hafa áhrif á sálrænan, líkamlegan, vitsmunalegan og félagslegan þroska barna. Helstu úrræði sem standa börnum til boða sem hafa upplifað heimilisofbeldi eða orðið vitni að því eru á vegum Barnaverndar, Barnahúss, Foreldrahúss og Samtaka áhugafólks um áfengis- og vímuefnavanda. Félagsráðgjafar þurfa að einblína á það að veita börnum og fjölskyldum þeirra viðeigandi úrræði. Félagsráðgjafar geta boðið þeim sem glíma við vímuefnavanda upp á félagslega aðstoð, auk þess að veita börnum í heimilsiofbeldismálum viðeigandi aðstoð með þeirri kunnáttu sem félagsráðgjafar hafa til þess að vinna í slíkum málum.