Ársreikningur og kennitölur. Samanburður fjögurra sérsambanda í íþróttum

Abstract

Í lokaverkefni þessu verður fjallað um uppbyggingu ársreikninga og kennitölur í ársreikningum valinna skipulagsheilda. Kennitölur eru í raun reiknaðar stærðir úr ákveðnum köflum ársreikninga sem lýsa fjárhagslegri afkomu skipulagsheilda. Ársreikningurinn á að veita gagnlegar upplýsingar og gefa glögga mynd af fjárhagslegri niðurstöðu rekstrar, efnahag og breytingu á handbæru fé. Kennitölurnar eru að mestu leyti nýttar til að bera saman við kennitölur fyrri ára, eða annarra tímabila, innan skipulagsheildar eða við kennitölur skipulagsheilda í svipaðri atvinnugrein. Í ritgerðinni verður farið yfir kennitölur fjögurra sérsambanda í íþróttum og fjallað um þær. Helstu niðurstöður þar gefa til kynna að sérsamböndin nýta fjármagnið sem þau afla til þess að efla íþróttastarf og er því ekki um mikinn hagnað að ræða. Þeim mun betri afkoma sem verður, þá er mun meira notað í kjarnastarfsemi sambandanna. Talsverður munur er á afkomu þeirra sérsambanda sem skoðuð voru og það sem ber höfuð og herðar yfir önnur sérsambönd er Knattspyrnusamband Íslands. Golfsamband Íslands stendur mjög sterkt fjárhagslega en hin tvö sem voru hér til samanburðar eru mun smærri og einfaldari í rekstri. Öll samböndin bera þess merki að skuldastaða þess er lítil í samanburði við handbært fé, standa nokkuð traustum grunni og geta horft bjartsýnum augum á framtíðina.