Áhrif umhverfis á heilastarfsemi: Forrannsókn

Abstract

Stýrð athygli er hugarstýrt athygliskerfi sem spilar lykilhlutverk í einbeitingu fólks. Það heldur áhrifum truflandi áreita í lágmarki, en er viðkvæmt fyrir hugrænni áreynslu. Samkvæmt ART kenningu Kaplans (1995) má endurnæra þetta athygliskerfi með því að virkja gagnastýrt athygliskerfi sem krefst engrar áreynslu. Fjöldi rannsókna hefur sýnt fram á endurnærandi áhrif náttúruumhverfis á athygli með þessum hætti. Þessi forrannsókn er undirbúningur fyrir stærri rannsókn sem mun athuga áhrif umhverfis á stýrða athygli. Lögð voru fyrir verkefni sem krefjast stýrðrar athygli sem byggjast á því að taka eftir breytingum áreita. Markmiðið var að athuga hvort verkefnið veiti gott mat á stýrðri athygli með því að bera saman niðurstöður við fyrri rannsóknir. Einnig var athugað hvort verkefni með lituð áreiti eða verkefni með svört og hvít áreiti hentaði betur. Aðeins einn þátttakandi var til rannsóknar. Heilavirkni var mæld með heilarafriti og virkni seinni CDA var athuguð eftir ólíkum skilyrðum verkefnanna: tvö markáreiti, tvö markáreiti ásamt truflurum og fjögur markáreiti. Búist var við því að sveifluvídd fyrir fjögur markáreiti væri meiri en sveifluvídd fyrir tvö markáreiti, en sveifluvídd skilyrðis með truflurum væri þar á milli. Reiknuð varminnisrýmd með Pashler‘s K, úr atferlisgögnum. Ekki fannst munur á minnisrýmd eftir skilyrðum og enginn marktækur munur fannst á sveifluvídd seinni CDA milli skilyrða. Enginn marktækur munur var á niðurstöðum eftir lit áreita. Niðurstöður eru í ósamræmi viðfyrri rannsóknir, en taka þarf tillit til þess að gögnin koma einungis frá einum þátttakanda. Mikið suð var í gögnum frá heilarafriti. Mikilvægt er að ráða úr vanköntum þessa verkefnis eða velja nýtt verkefni í komandi rannsóknum.