Skóli án aðgreiningar : upplifun ólíkra faghópa í skóla margbreytileikans

Abstract

Viðfangsefni þessarar ritgerðar var að kanna upplifun ólíkra fagaðila til stefnunnar um skóla án aðgreiningar. Gerð var eigindleg viðtalsrannsókn og var markmið rannsóknarinnar að koma á framfæri reynslu og upplifun ólíkra faghópa af störfum þeirra í skólum margbreytileikans. Eftirfarandi rannsóknarspurning var höfð að leiðarljósi: „Hver er upplifun ólíkra faghópa af því að starfa í skóla margbreytileikans?“.Við rannsókn þessa var notast við eigindlegar rannsóknaraðferðir sem byggjast á opnum viðtölum. Rætt var við ólíka fagaðila sem allir starfa í grunnskólum, en einnig var frekari gagna aflað úr skriflegum heimildum. Viðmælendur voru fimm, tveir þroskaþjálfar, tveir umsjónarkennarar og einn sérkennari. Niðurstöður leiddu í ljós að fagaðilar upplifa ákveðin vanmátt í störfum sínum vegna þess að af þeim er krafist ákveðinnar sérfræðiþekkingar sem ekki fylgir með í menntun þeirra og fyrir vikið eru þeir ekki í stakk búnir til þess að mæta öllum nemendum þar sem þeir eru staddir. Eigi skóli án aðgreiningar að ganga upp, þarf að endurhugsa stefnuna og hafa fagfólk með í ráðum. Jafnframt þarf að auka fjármagn til skólanna, fjölga fagfólki og bæta við stuðningsfulltrúum en einnig þarf að auka fræðslu fyrir allt starfsfólk.