Réttmæti Norræns spurningalista um líkamlega hreyfingu (NSULH) hjá 18-65 ára Norðurlandabúum

Abstract

Inngangur: Norræni spurningarlistinn um líkamlega hreyfingu (NSULH) er sameiginlegt norrænt sjálfsmats mælitæki sem mælir líkamlega hreyfingu og kyrrsetu hjá fullorðnum einstaklingum á Norðurlöndunum. Honum er ætlað hlutverk í Norrænni samvinnu og bæta framkvæmd og metnað í söfnun á mikilvægum upplýsingum fyrir stefnumótun og aðgerðir í lýðheilsu á Norðurlöndunum. Markmið rannsóknarinnar er að meta réttmæti NSULH í þremur löndum Norðurlandanna; Finnlandi, Noregi og Íslandi.Aðferðir: Spurningalistinn var saminn af sérfræðingum á ensku og yfirfarinn af enskumælandi aðila, þýddur á hvert tungumál (finnsku, íslensku og norsku) og þýddur til baka á frummálið. Þátttakendur voru spurðir um heildar hreyfing á viku, bæði varðandi meðalerfiðar og erfiðar hreyfingar og erfiðar hreyfingar eingöngu. Spurningalistinn innihélt einnig spurningar um sjónvarpsáhorf og tölvunotkun. Forprófun fór fram á Íslandi, í Noregi og Finnlandi í ágúst 2009. Gögnum var síðan safnað í löndunum þremur frá miðjum október fram í miðjan mars 2010. Hröðunarmælar (ActiGraph-mælar af gerðinni GT1M eða GT3X) voru afhentir þátttakendum (18-65 ára sjálfboðaliðum, n=188). Átta dögum síðar var hringt í hvern þátttakanda og viðkomandi látinn svara NSULH í gegnum síma. Aðeins gögn frá þátttakendum sem skiluðu að lágmarki fimm daga gögnum úr hröðunarmælum, og a.m.k. 10 klst gögnum hvern daginn, voru notuð í greininguna. Ef engin virkni var skáð á hreyfimæli í ≥60 mín, þá var sá tími skilgreindur sem tími án mælis. Ein lota var skilgreind sem virkni fyrir ofan ákveðin mörk í 10 mín eða meira. Mörkin fyrir meðal hreyfingu voru skilgreind sem 2020 slög/mín og 5999 slög/mín fyrir erfiða hreyfingu. Fyrir kyrrsetu voru mörkin skilgreind sem að minnsta kosti 10 mín af samfelldri hreyfingu fyrir neðan 100 slög/mín.Niðurstöður: Alls reyndust gögn frá 165 þátttakendum nothæf (n=165). Í öllum löndum er miðlungsgóð fylgni (r=0,30 til 0,45) á milli sjálfsmats og gilda úr hröðunarmælum fyrir meðalerfiða og erfiða hreyfingu. Íslensku gögnin skera sig úr fyrir erfiða hreyfingu (r=0,05; p=0,68), en fylgnin var svipuð hjá hinum löndunum (r=0,36 til 0,46). Hins vegar var sjálfsmatið alltaf töluvert hærra en gögnin úr hröðunarmælunum. Sjálfsmatið fyrir meðalerfiða og erfiða hreyfingu var 4,7 klst/viku (SF=4,3) og samkvæmt hröðunarmælunum var það 1,7 klst/viku (SF=1,9; p<0.001). Sjálfsmatið fyrir erfiða hreyfingu var 1,5 klst/viku (SF=2,6) og samkvæmt hröðunarmælunum var það 0,3 klst/viku (SF= 0,7; p<0,001). Að íslensku svörunum undanskildum þar sem fylgnin var 0,07 (p=0,61) var miðlungsgóð fylgni á milli sjónvarpsáhorfs og tölvunotkunar annars vegar og kyrrsetu hins vegar samkvæmt gögnum úr hröðunarmælum (r=0,36-0,46). Þá gáfu hröðunarmælarnir til kynna að þátttakendur eyddu töluvert lengri tíma í kyrrsetu 4,5 klst/viku (SF=2,0) en svör um sjónvarpsáhorf og tölvunotkun gáfu til kynna 2,5 klst/dag (SF=1,5; p<0,001).Ályktun. NSULH sem metur hreyfingu og kyrrsetu hjá fullorðnum einstaklingum, sýnir svipaða fylgni við gögn úr hröðunarmælum og aðrir, ítarlegri spurningalistar. Hann er því réttmætt og hentugt mælitæki til að nota í samnorrænum verkefnum.