Áhrif nýrra CP3-viðmiða Evrópusambandsins á mat íslenskra stjórnvalda á skráningarhæfi orð- og myndmerkja með lýsandi orðhluta

Abstract

Ritgerð þessi fjallar um inntak og áhrif svonefndra CP3-viðmiða Evrópusambandsins á sviði vörumerkja sem gildi tóku á Íslandi 15. september 2017. Umrædd viðmið, sem lúta að mati á skráningarhæfni orð- og myndmerkja með lýsandi orðhluta, tóku gildi innan Evrópusambandsins árið 2015 og voru liður í samræmingu aðildarríkja sambandsins varðandi mat á því hvort vörumerki sem teljast til orð- og myndmerkja með lýsandi orðhluta teljist uppfylla ákvæði laga um sérkenni. Á grundvelli aðildar Íslands að Samningnum um evrópska efnahagssvæðið ákváðu íslensk stjórnvöld að taka CP3-viðmiðin upp í sína framkvæmd.Viðfangsefni þessarar ritgerðar er annars vegar að fjalla um inntak CP3-viðmiðanna og hins vegar að meta möguleg áhrif þeirra á mat íslenskra stjórnvalda á skráningarhæfni orð- og myndmerkja með lýsandi orðhluta. Í þeim tilgangi verður fyrst fjallað um lykildóma á sviði Evrópuréttar fyrir gildistöku viðmiðanna sem og framkvæmd íslenskra stjórnvalda í kjölfar niðurstöðu þeirra mála fram til 15. september 2017. Þá verður greint frá inntaki CP3-viðmiðanna og áhrif þeirra á framkvæmd á sviði Evrópuréttar. Að síðustu verður litið til framkvæmdar íslenskra stjórnvalda eftir gildistöku viðmiðanna hérlendis með það að leiðarljósi að kanna hvort CP3-viðmiðanna hafi haft merkjanleg áhrif á þeirra framkvæmd.