Kynjaverur í pólitík. Ólík fjölmiðlaumfjöllun um stjórnmálakonur og -karla

Abstract

Kynjakerfið er stór hluti af okkar daglegu lífi og innan þess þrífast hugmyndir um kvenleika og karlmennsku. Fjölmiðlar eru oft kallaðir „fjórða valdið“ og eiga stóran þátt í að viðhalda kynjakerfinu og halda uppi staðalmyndum kynjanna með kynjaðri fjölmiðlaumfjöllun. Markmið þessa verkefnis er að skoða hvernig fjölmiðlar fjalla á ólíkan hátt um konur og karla. Það er, með hvaða hætti fjallað er um stjórnmálakonur annars vegar og stjórnmálakarla hins vegar og hvernig sú umfjöllun tengist hugmyndinni um kvenleika og karlmennsku. Rannsóknin byggir á sex innslögum úr sjónvarpsþættinum Ísland í dag þar sem fjórar stjórnmálakonur og tveir stjórnmálakarlar eru til umfjöllunar. Innslögin eru orðræðugreind og sett í samhengi við kynjakerfi Walby, karlmennsku Connell, kvenleika og leiðandi ímyndir hans og önnur femínísk fræði, kynjafræði og fyrri rannsóknir, meðal annars um fjölmiðlaumfjöllun um konur. Helstu niðurstöður eru að umfjöllun Íslands í dag um stjórnmálakonurnar og stjórnmálakarlana er kynjuð. Þannig birtist karlmennskan meðal annars í formi hetjunnar, sem er sú mynd sem dregin er upp af stjórnmálakörlunum. Hinar ýmsu leiðandi ímyndir kvenleikans eru hins vegar dregnar upp í umfjölluninni um stjórnmálakonurnar eins og móðirin, fegurðardísin, heimsborgarinn, auðmjúka kvenhetjan, listamaðurinn og hin órólega.