Leiðsögn í leikskóla : hvers vegna er hún mikilvæg?

Abstract

Tilgangur ritgerðarinnar er að gera grein fyrir mikilvægi góðrar leiðsagnar í leikskólum og hvers vegna sú þekking er nauðsynleg. Gerð er grein fyrir hvaða áhrif leiðsögn hefur á kennara og aðra starfsmenn leikskólans sem og starfsumhverfi þeirra. Margt hefur breyst í íslensku þjóðfélagi síðustu áratugina og hafa leikskólar landsins ekki farið varhluta af því. Leikskólakennurum fækkar, færri sækja í leikskólakennaranám, starfsmannahópurinn er fjölbreyttari en áður og starfsmannavelta er mikil. Leiðsögn getur verið áhrifavaldur þegar kemur að því að styðja við leikskólastarfið á breytingatímum. Fjallað er um leiðsagnarkenningar, samskipti og hlutverk leiðsagnar í myndun lærdómssamfélags. Leiðsagnarhlutverkið getur verið flókið og erfitt en jafnframt góð leið til starfsþróunar. Komið er inn á kulnun og starfsánægju og skoðað hvort áhrifa leiðsagnar gæti þar. Lagt er upp með rannsóknarspurninguna: Hvers vegna er leiðsögn mikilvæg í leikskólanum? Ritgerðin er fræðileg umfjöllun um leiðsögn og mikilvægi hennar. Helstu niðurstöður ritgerðarinnar eru þær að auka þarf leiðsögn og þekkingu á henni frá því sem nú er. Góð leiðsögn gerir nýliða, kennara og starfsmenn öruggari í starfi og getur haft úrslitaáhrif á að viðkomandi haldi áfram störfum. Leiðsögn hefur áhrif á starfsumhverfi kennara og styrkir stöðu lærdómssamfélagsins. Það er því til mikils að vinna að styðja við og styrkja stöðu leiðsagnar í leikskólaumhverfinu.