Stafræn miðlun öryggisupplýsinga á vefsíðum í ferðaþjónustu

Abstract

Fjöldi ferðamanna til Íslands hefur hátt í fimmfaldast á innan við áratug. Því hafa fylgt margskonar áskoranir, sérstaklega vegna þess að innviðir landsins voru ekki reiðubúnir fyrir þennan fjölda, þessa aukningu ferðamanna árið 2010. Þrátt fyrir að stjórnvöld og aðrir hafi lagt fjármagn og vinnu í uppbyggingu hefur ekki náðst að halda í við fjöldann. Þetta er skiljanlegt sé horft til þess að árið 2010 kom um hálf milljón ferðamanna til landsins en árið 2018, á síðasta ári var fjöldinn vel yfir tvær milljónir. Ein af þeim áskorunum sem fylgt hafa þessari miklu aukningu er meiri þörf á miðlun öryggisupplýsinga. Með óundirbúna innviði, vegakerfi sem þarfnast meiri þjónustu og fjármagns og veðurfar sem er óstöðugt þurfa ferðamenn upplýsingar um aðstæður á ferðalagi sínu.Í þessari ritgerð er skoðað hvernig miðlun öryggisupplýsinga er á vefsíðum í íslenskri ferðaþjónustu en vefsíðan er oft fyrstu kynni ferðamanns við land, landshluta og fyrirtæki. Í rannsókninni voru 119 vefsíður skoðaðar með því að leita að ákveðnum orðum auk þess sem 19 þeirra voru rýndar nánar. Í þeirri rýni var horft til þess hvort efni var nýtt á réttan hátt, hvort leitarorð eru notuð, hvernig uppbygging síðna er háttað og hvernig hlekkir eru notaðir. Þannig var reynt að fá vísbendingu um það hvort eðli og uppbygging vefsíðna í ferðaþjónustu styður við miðlun öryggisupplýsinga með góðum vefvinnubrögðum eða hvort tækifæri eru til að gera betur.