Skilyrði málskots til Hæstaréttar : með tilkomu Landsréttar

Abstract

Skilyrði málskots til Hæstaréttar : Með tilkomu LandsréttarTilgangur og markmið ritgerðarinnar er taka til skoðunar hver skilyrði laga séu fyrir því að fá máli skotið til Hæstaréttar. Eftir setningu laga nr. 49/2016 um breytingu á lögum um meðferð einkamála og lögum um meðferð sakamála (millidómstig) og ný lög um dómstóla nr. 50/2016 voru sett var Landsrétti komið á fót og tók hann við af Hæstarétti sem áfrýjunardómstóll. Við lagabreytinguna fékk Hæstiréttur nýtt hlutverk í dómskerfinu sem réttarskapandi dómstóll. Til að nálgast viðfangsefnið er fjallað um hvert hafi verið markmið breytingarlaga nr. 49/2016 varðandi breytt hlutverk Hæstaréttar með tilliti til þeirra skilyrða sem mál þarf að uppfylla til að fá áfrýjunarleyfi til Hæstaréttar. Einnig verður tekið til skoðunar með hvaða hætti Hæstiréttur leggur mat á hvort skilyrði til veitingu áfrýjunarleyfis teljist vera uppfyllt og ennfremur verður litið til þess hvaðan fyrirmyndin að breytingarlögunum nr. 49/2016 var sótt. Í lögunum eru sett þröng skilyrði fyrir því hvenær heimilt sé að skjóta máli til Hæstaréttar og leggur rétturinn sjálfur mat á hvort skilyrðin teljist vera uppfyllt og tekur ákvörðun um hvort áfrýjunarleyfi er veitt eða ekki. Megin áherslan er lögð á umfjöllun um það hver skilyrðin eru til þess að fá máli skotið til Hæstaréttar og í hvaða tilvikum Hæstiréttur telur skilyrðin vera uppfyllt. Aukinheldur verður greint frá því hvaðan fyrirmyndin er tilkomin varðandi þessi þröngu skilyrði í lögunum um veitingu áfrýjunarleyfis til Hæstaréttar. Því næst verður skoðað hvernig Hæstiréttur leggur mat á skilyrðin og í hvaða málum hann hefur veitt áfrýjunarleyfi og þá á hvaða grundvelli. Að lokum eru svo helstu niðurstöður ritgerðarinnar dregnar saman um hver skilyrðin fyrir áfrýjunarleyfi til Hæstaréttar eru og dregnar saman ályktanir um það hvernig Hæstiréttur leggur mat á hvort skilyrði til veitingar áfrýjunarleyfis teljist vera uppfyllt.