Alvarleg blæðing í kjölfar fæðingar

Abstract

Blæðing í kjölfar fæðingar getur haft alvarlegar afleiðingar og er ein algengasta ástæða gjörgæsluinnlagna tengd meðgöngu eða fæðingu. Alvarleg blæðing í kjölfar fæðingar er algengasta orsök mæðradauða í heiminum. Megin tilgangur samantektar¬innar var að greina frá mati og meðferðum við blæðingu í kjölfar fæðingar og þeim afleiðingum sem blæðing getur haft. Skilgreining alvarlegrar blæðingar í kjölfar fæðingar var einnig skoðuð.Kerfisbundin samantekt var gerð, þar sem leitað var í gagnabankanum PubMed að rannsóknum á blæðingu í kjölfar fæðingar. Heimildaleit var takmörkuð við rannsóknargreinar birtar síðustu 5 ár á ensku eða íslensku.Blæðing í kjölfar fæðingar er skilgreind sem blóðmissir yfir 500 millilítrum. Nákvæmt eftirlit með blóðmissi fæst með vigtun blóðs. Lífsmarkamælingar ásamt blóðrauða-, laktat- og blóðsykursgildum geta stutt við mat á ástandi sjúklings með blæðingu í kjölfar fæðingar. Mælitækin MEOWS, MEWC, MEWT og MEWS eru næm fyrir fylgikvillum tengdum meðgöngu eða fæðingu en þó ekki fyrir blæðingu.Alvarlegar afleiðingar geta meðal annars verið dreifð blóðstorknun og blóð-þurrðarlost. Mat og eftirlit miðar að því að greina blæðingu í kjölfar fæðingar snemma svo hægt sé að grípa inn í með viðeigandi meðferð. Meðferð leitast fyrst og fremst við að koma í veg fyrir alvarlegar afleiðingar með því að stöðva blæðingu. Meðferð getur samanstaðið af samdráttaraukandi lyfjum, þrýstibelg og blóðhlutagjöf. Grípa getur þurft til ífarandi meðferða náist ekki stjórn á blæðingu. Mikilvægt er að koma í veg fyrir alvarlegar afleiðingar. Þar er snemmtæk meðferð lykilatriði. Rannsóknir sýna að tíðni alvarlegra afleiðinga er lægri ef meðferð hefst snemma, áður en blóðmissir verður mikill.