Ylströnd í Borgarnesi

Abstract

Verkefnið snýr að myndun baðlóns og útibaðaðstöðu við vesturströnd Borgarness. Lónið væri myndað með landfyllingu og brú með flæðiþröskuldi fyrir litla vík sem liggur á milli bílastæðis sundlaugar og enda Kjartansgötu. Ofan á færi strandastígur sem bætir tengingu milli gamla bæjarins og þess nýja.Aðgengi að víkinni yrði bætt, útipottar og baðaðstaða sett upp nærri sundlauginni og lagður rampur niður að lóninu fyrir báta. Fráfall frá sundlaug yrði nýtt til að hita pottana og halda vatni í lóninu þegar fjarar út.Skoðaðir eru kostir og gallar við legu strandastígs fyrir víkina og hvaða þýðingu það hefur fyrir samfélagið að hafa gott útivista- og frístundasvæði inni í byggðinni þar sem gott aðgengi er að sjó.Skoðuð eru sambærileg svæði á Íslandi þar sem svipaðar lausnir hafa verið gerðar bæði hvað baðströnd varðar og útilaug og aðstöðu. Útfærsla á strandastíg á landfyllingu er skoðuð með tilliti til legu hans út á leirurnar í Borgarvoginum.