Míkrótónar : takmarkanir þeirra og möguleikar

Abstract

Ritgerð þessari er ætlað að gefa lýsandi yfirlit yfir stöðu og stefnu míkrótóna í tónlist í dag, takmarkanir þeirra og möguleika. Efninu er skipt í þrjá meginkafla: skynjun (hvernig við heyrum og upplifum míkrótóna), miðlun (hvernig við byggjum upp þekkingu á míkrótónum og miðlum henni okkar á milli og til næstu kynslóða) og framköllun (hvernig við köllum fram og spilum míkrótóna). Vegna fjölda af nýjum hugtökum og þýðingum þeirra má finna viðauka A aftast sem hefur þann tilgang að gefa íslenskar-enskar þýðingar á tónlistarhugtökum og útskýra þau ítarlegar. Hugtakalistinn er kaflaskiptur eftir viðfangsefni og eru atriði hans því í merkingarfræðilegri röð frekar en stafrófsröð. Ætlunin er sú að viðaukinn geti staðið sjálfstætt og brúi bilið á milli raungreina eins og stærðfræði, eðlisfræði, verkfræði og tölvunarfræði annars vegar og tónlistarfræða hins vegar, sem einskonar kennsluhefti. Í viðauka B er greint frá hugbúnaði sem minnst er á í ritgerðinni með skjáskotum ásamt kostum og göllum við notkun þeirra.Helstu niðurstöður eru þær að fræði míkrótóna, í senharmónískum (e. xenharmonic) skilningi, sé opinn vettvangur fyrir frekari rannsóknir, hugbúnaðarþróun, kennsluefni og tónsmíðar með aukinni tækniþróun 21. aldar.