Það er leikur að læra, leikur sá er mér kær : nám fyrir alla - kennsluefni - Eyðieyjan

Abstract

Þessi greinargerð er lögð fram með kennsluefni til B.Ed.– prófs í grunnskólakennslu yngri barna við Háskóla Íslands. Meginmarkmiðið með kennsluefninu er að útbúa verkefni sem hentar nemendum í 4. bekk, með það fyrir augum að uppfylla hæfniviðmið í Aðalnámskrá grunnskóla og koma inn á allar af greindunum átta sem Howard Gardner notaði sem grundvöll til að kortleggja svið mannlegra möguleika. Kennsluverkefnið Eyðieyjan er heildstætt verkefni sem kemur inn á listir, sköpun og hugmyndavinnu, en tengist saman inn á flestar greinar sem kenndar eru í grunnskólum á Íslandi.Einnig á þetta verkefni að auðvelda nemendum að öðlast meiri og dýpri skilning á námsefninu. Í þessu verkefni eru kynntar margar náms- og kennsluaðferðir sem henta fjölbreyttum nemendahópi og fjölgreindakenningu Gardners. Við munum fylgja einum af frumkvöðlum kennslufræða, John Dewey, sem hefur komið fram með fjölbreyttar kennsluaðferðir og sett sitt mark á fræðigreinina þegar kemur að fjölbreyttum viðfangsefnum. Dewey telur að í námi og kennslu séu allir nemendur jafn ólíkir og þeir eru margir. Til þess að ná til allra nemenda þarf að koma til móts við fjölbreytileikann og nota margar aðferðir.