„Við þurfum að ganga á eftir fjölmiðlum“: Áhrif kvennaáratugsins á umfjöllun um íþróttakonur í völdum blöðum 1975 og 1985

Abstract

Hlutur íþróttakvenna í fjölmiðlum hefur verið mun minni en karla í gegnum tíðina. Sjálf umfjöllunin hefur líka verið ólík en kynjuð umræða hefur verið ráðandi. Í þessari ritgerð verða greinar um íþróttakonur skoðaðar í Íþróttablaðinu og Skinfaxa árin 1975 og 1985. Einnig verða skoðaðar valdar vikur í bæði Morgunblaðinu og Vísi sem hafði breyst í Dagblaðið Vísi árið 1985. Árið 1975 er kvennaár Sameinuðu þjóðanna og árið 1985 lýkur kvennaáratug Sameinuðu þjóðanna. Reynt er að sjá hvort að kvennaáratugurinn hafi haft einhver áhrif á umfjöllun um íþróttakonur í blöðunum, hvort sem það er í fjölda greina eða hvort að orðræðan er ólík um íþróttakonur en karla. Munur á milli þessa ára liggur í að árið 1985 voru byrjaðar að heyrast gagnrýnisraddir á þennan mismun á umfjöllun á milli kynjanna. Konur voru farnar að veita því athygli bæði hvernig var talað um þær og hversu fáar greinar voru um íþróttakonur miðað við karla.