Þétting byggðar á höfuðborgarsvæðinu: Tengsl við hugmyndafræði þéttrar borgarbyggðar

Abstract

Mikilvægi borga í samhengi loftslagsbreytinga er tvímælalaust vegna þeirra umhverfisáhrifa sem frá þeim stafa. Áhrifanna gætir ekki einungis innan borga heldur ná þau langt út fyrir landfræðilegt svæði þeirra. Til þess að lágmarka þessi áhrif er vert að líta til borgarskipulags og þeirra skipulagstóla sem gefa kost á því að gera borgrýmið að stað sem mætir þörfum sjálfbærrar þróunar. Í þessari rannsókn verður horft til hugmyndafræði þéttrar borgarbyggðar og hún mátuð við aðalskipulagsskjöl sveitarfélaganna á höfuðborgarsvæðinu, að Kjósarhreppi undanskildum. Markmið rannsóknarinnar er að athuga hvort og hvernig áherslur um þéttingu byggðar í aðalskipulagsskjölum sveitarfélaganna samrýmast hugmyndum þéttrar borgarbyggðar. Þá verður einnig horft til þess hvort sveitarfélögin nálgist þéttingu út frá heildrænni sýn hugmyndafræðinnar þar sem heildstæð nálgun er grundvallaratriði til þess að ná fram markmiðum um sjálfbærara borgrými. Til þess að meta skipulagsáætlanir sveitarfélaganna voru aðalskipulagsskjöl þeirra greind með megindlegri innihaldsgreiningu og niðurstöður greiningarinnar skoðaðar með tilliti til þeirra ummæla sem fram komu. Niðurstöður rannsóknarinnar leiða í ljós að þrjú sveitarfélaganna leggja mikla áherslu á alla þættina sem einkenna hugmyndafræði þéttrar borgarbyggðar og gera það út frá heildrænni nálgun. Hin sveitarfélögin þrjú leggja minni áherslu á þætti þéttrar borgarbyggðar og gera það ekki út frá heildrænni nálgun.