Greiðslukortanotkun Íslendinga: Greining á breytingu netverslunar á meðal Íslendinga.

Abstract

Í þessari rannsókn var skoðað hvernig verslun, þá sér í lagi netverslun, hefur aukist undanfarin ár út frá gögnum sem færsluhirðingarfyrirtækið Borgun útvegaði. Er þetta eflaust í fyrsta sinn sem svo stórt gagnasafn er skoðað, og sér í lagi raungögn þar sem fyrri rannsóknir og greinar um sambærilegt efni virðast vera unnar úr könnunum með fremur litlu úrtaki. Um 107 milljón færslur voru skoðaðar sem spanna tímabilið 2016 til 2020, og í ljós kom að netverslun er að stækka umtalsvert hraðar en áður hefur verið gefið út. Fjöldi net- og áskrifta færslna fjölga um 37.4% á milli ára. Færslur í hefðbundinni verslun fjölgar sambærilega, en hlutfallslega er aukningin talsvert meiri í netverslun. Ekkert lát virðist á þessu og stækkar netverslun hraðar með hverju árinu. Fyrir árið 2019 voru um 20% allra færslna sem gerðar voru net- eða áskriftafærslur. Í ljós kom að þrátt fyrir að meðalupphæð á færslu sé hærri á meðal íslenskra netverslanna, er erlend netverslun margfalt stærri þar sem er árlega er eytt 44% hærri fjárhæðum í erlenda verslun. Gera má ráð fyrir að um 60 milljörðum var eytt í erlenda netverslun árið 2019 af Íslendingum. Eldri rannsóknir hafa greint frá því að Íslendingar nýta sér netverslun talsvert minna en okkar nágrannaþjóðir, en niðurstöður sýna það einmitt að með aukinni notkun Íslendinga á netverslun sækjum við sífellt meira í erlenda verslun frekar en í innlenda verslun. Ljóst er að kaup á lúxusvöru fram yfir kaup á nauðsynjavöru er umtalsvert meiri á meðal netverslanna, þó að nýjar tegundir þjónustna og verslanna séu meðal þeirra flokka sem stækka hvað mest í net- og áskriftarverslun. Hagræði á ýmsum sviðum getur verið fólgið í netverslun, bæði fyrir seljandann og neytendann. Enn fremur er einn af mörgum kostum netverslunnar sá að geta verið með opið allan sólarhringinn, alla daga ársins. Í ljós kemur að verslun er heilt yfir litið nokkuð jöfn allan sólarhringinn en er nær þó hámarki á kvöldin en lágmarki snemma morgna. Helgar sem og almennir frídagar mælast mun minni en virkir dagar vikunnar sem teljast til almennra vinnudaga, þegar skoðað er netverslun. Karlar og konur nýta sér netverslun nokkuð jafnt, og virðast eldri aldurshópar, sem áður eyddu minni fjárhæðum í netverslanir, vera að sækja á og brúa bilið. Heilt yfir litið er ljóst að íslensk verslun þarf að fara spýta í lófana og fylgja eftir þeirri þróun sem er að eiga sér stað á heimsvísu ef ekki á að missa meiri verslun úr landi en nú þegar er gert.