Andstyggilegar konur: Skaðlegar karlmennskuhugmyndir Donald Trump

Abstract

Í þessari ritgerð eru skaðlegar karlmennskuhugmyndir Donald Trump, núverandi forseta Bandaríkjanna, til umfjöllunar. Kynntar eru helstu kenningar fræðimanna um kyn og kyngervi; kynjakerfið; karlmennsku og kvenleika, ásamt því að farið verður yfir hugmyndir um kyn í stjórnmálum. Gerð er grein fyrir þremur þjóðfélagshópum þar sem framkoma Trump hefur komið hvað skýrast fram, og eru þeir hópar eftirfarandi: valdamiklar konur, valdamiklir karlar og undirskipaðir karlar. Tilvikin þrjú eru tengd fyrrnefndum fræðikenningum og ljósi varpað á það með hvaða hætti hin skaðlega karlmennska birtist, bæði í orðum og gjörðum forsetans. Orðræðugreining fræðimannsins Ingólfs Ásgeirs Jóhannessonar er enn fremur höfð til hliðsjónar við greiningu viðfangsefnisins. Umfjöllun ritgerðarinnar sýnir að megineinkenni skaðlegrar karlmennsku birtast með skýrum hætti bæði í orðalagi og framkomu Donald Trump gagnvart þeim hópum sem teknir voru til skoðunar. Helstu birtingarmyndir þess eru kynjuð orðræða með notkun merkingarbærra orða sem einkennast af hugmyndum um karllæg yfirráð; upphafning ríkjandi karlmennsku og lítillækkun annarra tegunda; og valdmannsleg líkamstjáning. Niðurstöðurnar gefa einnig til kynna að slík hegðun sé kerfisbundin í samfélaginu og stuðli að því að viðhalda rótgrónu kynjakerfi sem hallar á konur og stendur vörð um hagsmuni karla.