Siðferðisleg álitaefni í markaðsstarfi. Hvað er siðlegt markaðsstarf og hvar liggja mörkin á siðsemi og ósiðsemi?

Abstract

Bakkalársverkefni þetta fjallar um siðlegt markaðsstarf, hvað það er í raun og hvers vegna fyrirtæki gætu stundað markaðsstarf sem mælir gegn siðferðisviðmiðum. Fjallað verður um hugtakið siðlegt markaðsstarf á fræðilegan hátt. Markmið ritgerðarinnar er að reyna að skýra betur hugtakið siðlegt markaðsstarf og rýna betur í óljós viðmið siðsemi í því samhengi. Heimildir eru fengnar úr ýmsum fræðilegum greinum og skýrslum þar sem siðlegt markaðsstarf hefur verið til umfjöllunar og nýttar til að varpa ljósi á hugtakið og draga upp af því skýra mynd. Fjallað verður um hvers vegna fyrirtæki ættu að stunda siðlegt markaðsstarf og hvaða áhrif það getur haft á starfssemi fyrirtækis að stuðla að ábyrgu og siðlegu markaðsstarfi. Einnig verður reynt að varpa ljósi á hvar mörkin milli siðsemi og ósiðsemi liggja. Það að vera siðlegur merkir í grunninn að koma vel fram. Það ætti því að vera einfalt að skilgreina hvenær markaðsstarf er siðlegt og hvenær ekki en þar sem gildismat einstaklinga og samfélaga getur verið ólíkt, er einstaklingsbundið hvenær ákveðin háttsemi og/eða hegðun telst vera orðin óviðeigandi eða ósiðleg. Neytendastofa var stofnuð til þess að hafa eftirlit með því hvort fyrirtæki væru að sinna markaðsstörfum í samræmi við lög sem sett eru af Alþingi. Engin frekari inngrip eru tiltæk við eftirlit á markaðsstarfi sem telst vera gegn siðferðisviðmiðum. Megin niðurstaða ritgerðarinnar er sú að erfitt er að sýna fram á óheiðarlegt markaðsstarf. Siðlegt markaðsstarf er á gráu svæði sem vandasamt er að greina. Aðrar niðurstöður sýna einnig að hægt væri að reyna að setja ramma eða líkan utan um tiltekin mál sem teljast til siðferðislegra álitaefna. Það væri á ábyrgð fyrirtækja að smíða slíkan ramma í samræmi við sínar siðareglur, af því gefnu að fyrirtæki hafi sett sér siðareglur til að starfa eftir. Höfundur leggur til að innleitt verði líkan sem hann hefur gert beinagrind að sem hvert fyrirtæki gæti aðlagað að sinni starfsemi og þar af leiðandi væri líkanið að mæla út frá þeirra eigin siðareglum og gildismati.