Er gott að búa í Fjallabyggð? Fasteignakaup í Fjallabyggð sem fjárfestingarkostur

Abstract

Stærsti hluti ritgerðarinnar snýr að því að skoða ólíka kostnaðarliði milli sveitarfélaga en þar ber helst að nefna fasteignagjöld og útsvar. Einnig er farið yfir það hvað gerir fasteignakaup á landsbyggðinni freistandi. Það fylgja öllum ákvörðunum vankantar og því er jafnframt farið yfir ókosti þess að búa á landsbyggðinni og þess að fjárfesta í fasteign utan höfuðborgarsvæðisins. Markmið ritgerðarinnar er í raun tvíþætt; að skoða samkeppnishæfi Fjallabyggðar, sem sveitarfélags, gagnvart höfuðborgarsvæðinu. Á sama tíma er litið á hugsanlega áhættuþætti sem fylgja því að flytja á landsbyggðina, svo sem hugsanlega launalækkun, takmarkað framboð atvinnu og þróun fasteignaverðs.Til að svara rannsóknarspurningunni eru fasteignagjöld í Fjallabyggð brotin niður og borin saman við önnur sveitarfélög, fyrirliggjandi gögn skoðuð og lagt mat á hversu ólíkir kostirnir eru; að kaupa fasteign á höfuðborgarsvæðinu eða í Fjallabyggð. Niðurstaðan er sú að það er ástæða fyrir lágu fasteignaverði á landsbyggðinni, þar sem stærstur hluti fasteigna á landsbyggðinni er kominn til ára sinna og oft kominn tími á töluvert viðhald. Verðmunur á fasteignum hefur mikið vægi, útborguð laun þurfa að vera um það bil þrefalt hærri ef valið er að kaupa fasteign á höfuðborgarsvæðinu frekar en í Fjallabyggð. Þegar kemur að fasteignagjöldum er Fjallabyggð þó hvorki með áberandi há né lág fasteignagjöld. Þrátt fyrir að flestir liðir í fasteignagjöldunum komi vel út hjá Fjallabyggð eru vatns- og fráveitugjöld áberandi há í Fjallabyggð. Mesta hættan sem fylgir því að kaupa fasteign á landsbyggðinni er að raunhækkun fasteigna á landsbyggðinni hefur ekki verið eins mikil og á höfuðborgarsvæðinu.