Áhrif stýrðrar kennslu og fimiþjálfunar á lestrarfærni 12 ára stúlku með greiningu athyglisbrests með ofvirkni

Abstract

Lestur og lestrarfærni er ein mikilvægasta færni sem börn öðlast á lífsleiðinni, þar sem lestrarfærni er undirstaða nánast alls náms. Til að auka lestrarfærni barna hefur stýrð kennsla Engelmanns og fimiþjálfun mikið verið notuð. Stýrð kennsla og fimiþjálfun eru raunprófaðar kennsluaðferðir sem hafa verið mikið rannsakaðar varðandi lestrarkennslu og hafa rannsóknir sýnt fram á góðan árangur. Börn sem hafa verið greind með athyglisbrest með ofvirkni (AMO) eiga oft erfitt með að einbeita sér og getur það haft áhrif á getu þeirra til að læra, þess vegna er ekki óalgengt að börn með AMO séu einnig greind með námsörðugleika. Börn með námsörðugleika eiga yfirleitt erfitt með lestur og hafa rannsóknir sýnt fram á það að stýrð kennsla og fimiþjálfun hafi góð áhrif á námsfærni þeirra barna, og þá sérstaklega á lestrarfærni. Markmið rannsóknarinnar var að skoða áhrif stýrðrar kennslu og fimiþjálfunar á lestrarfærni 12 ára tvítyngdrar stúlku sem hefur verið greind með athyglisbrest með ofvirkni. Þátttakandi var eftir á í lestri miðað við jafnaldra sína og var búin að fá stýrða kennslu og fimiþjálfun í nokkrar vikur áður. Niðurstöður sýndu fram á jákvæð áhrif þessara aðferða við að bæta lestrarfærni hennar, þar sem færni þátttakanda jókst í að hljóða lágstafi og í að lesa stutt orð. Niðurstöðurnar styðja því við fyrri rannsóknir um að beiting stýrðrar kennslu og fimiþjálfunar við lestrarkennslu í skólum beri góðan árangur, og þá sérstaklega fyrir börn með athyglisbrest með ofvirkni og/eða námsörðugleika.