Atvinnustefna á Íslandi 1900 - 2009

Abstract

Ritgerð þessi fjallar um atvinnustefnu á Íslandi. Hér verður leitast eftir því að svara tveimur spurningum. Hvernig hefur atvinnustefna þróast á Íslandi? Hver er atvinnustefna stjórnmálaflokkanna og ríkisstjórnarinnar árið 2009?Hvað varðar þróun atvinnustefnu á Íslandi þá hefur atvinnustefnan tekið miklum breytingum frá árunum 1900 til 2009. Atvinnulíf á Íslandi einkenndist lengi af miklum ríkisumsvifum og regluveldi. Árið 1991 var mynduð ný ríkisstjórn sem boðaði breytingar á atvinnustefnu Íslands. Umhverfi atvinnulífs þróaðist úr því að vera reglumótað og þvingandi yfir í frjálsræði. Ríkið dró úr umsvifum sínum í atvinnulífinu og fyrirtæki og stofnanir í eigu ríkisins voru einkavædd. Atvinnustefna stjórnmálaflokkanna og ríkisstjórnarinnar árið 2009 er skoðuð til hlítar. Það sem einkennir atvinnustefnu þessara aðila er áhersla á nýsköpun og að draga úr atvinnuleysi. Helstu deiluefni flokkanna eru fjögur og snúast um fiskveiðistjórnunarkerfið, Evrópusambandið, aðkomu ríkisins að atvinnustarfsemi og að lokum stóriðju og umhverfissjónarmið.