Ný-rasismi í reynd

Abstract

Efni þessarar ritgerðar er fyrirbærið ný-rasismi sem talinn er skera sig frá hinum hefðbundna rasisma með áherslunni á menningu í stað kynþáttar, sem sá þáttur sem aðgreinir fólk í hópa. Hugtakið er umdeilt og er í ritgerðinni leitast við að skera úr um ýmis álitamál sem upp hafa komið, svo sem hvort ný-rasismi sé raunverulega til, hvort hann sé nýr, hvort hann sé dulinn og hvernig hann skeri sig frá hinum hefðbundna rasisma. Skoðuð eru nokkur dæmi um ný-rasíska hugsun og hvar hún kemur helst fram í nútímanum. Einnig er litið á það hvort slík ný-rasísk hugsun eigi sér stoð í raunveruleikanum. Helstu niðurstöður eru þær að ný-rasismi er raunverulegt fyrirbæri, en þó liggur ekki alltaf í augum uppi að hvaða leyti í honum felist rasismi. Að því leytinu er hann dulinn, þó svo að fólk sé ekki alltaf að fela fordóma sína. Hann er ekki endilega nýtt fyrirbæri en hefur þó orðið meira áberandi á síðustu áratugum, þá sérstaklega í sambandi við samskipti Vesturlandabúa og múslima. Sú kenning að fólk úr þessum tveimur menningarheimum geti ekki búið saman í sátt og samlyndi vegna ólíkrar og ósamrýmanlegrar menningar virðist ekki eiga sér stoð í raunveruleikanum. Að lokum er því svarað hvort hægt sé að gagnrýna menningu án þess að það einkennist af ný-rasisma og niðurstaðan úr því er að það sé í reynd hægt.