Áhrif markvissrar heilsueflingar á heilsu 65 ára og eldri einstaklinga

Abstract

Tilgangur rannsókninnar var að kanna hvort sex mánaða markviss heilsuefling hafi áhrif á heilsu og ýmsar heilsufarsbreytur eins og þol, styrk, liðleika, blóðþrýsting og líkamssamsetningu hjá 65 ára og eldri einstaklingum. Eldri borgarar er sá hópur samfélagsins sem hreyfir sig minnst og þurfa mest á heilbrigðisþjónustu að halda. Mikilvægt er að eldri borgarar hreyfi sig í að minnsta kosti þrjátíu mínútur á dag þar sem hreyfing hefur jákvæð áhrif á heilsu fólks og lífsgæði. Í febrúar 2020 voru framkvæmdar mælingar öðru sinni á fólki á aldrinum 64-89 ára í Vestmannaeyjum sem voru þátttakendur í verkefninu Fjölþætt heilsuefling 65+ í Vestmannaeyjum undir merkjum Janusar heilsueflingar. Fyrri mælingar voru framkvæmdar í september 2019. Þátttakendur í seinni mælingu voru 72 talsins, 42 konur og 30 karlar. Byrjað var á mælingum á líkamssamsetningu, þar á eftir var liðleiki mældur, hreyfifærni, styrkur og að lokum þol ásamt því að þátttakendur svöruðu spurningum um daglega hreyfingu og heilsu. Niðurstöður sýna fram á jákvæðar breytingar og marktækan mun eftir sex mánaða íhlutun á hreyfifærni, styrk, þoli, daglegri hreyfingu og heilsu. Í öðrum prófum sem framkvæmd voru var ekki um marktækan mun að ræða milli mælinga. Markmið verkefnisins var fyrst og fremst að rannsaka hvort markviss þjálfun eldra fólks hafi áhrif á heilsutengda þætti eldri aldurshópa, lífsgæði þeirra og aukið sjálfstæði.