Hreyfifærni, hreysti og sjálfsmat 5-6 ára barna í leikskóla

Abstract

Tilgangur: Tilgangur rannsóknarinnar var að skoða hreyfifærni, hreysti og sjálfsmat barna í leikskóla á aldrinum 5-6 ára.Aðferð: Þátttakendur rannsóknarinnar voru í elstu deild leikskólans á Rauðhól, 5-6 ára. Þau voru 52 í heildina, 25 stúlkur (48%) og 27 drengir (52%). Þátttakendur tóku 4 hreyfifærnipróf úr Test of Motor Competence (TMC) prófabankanum ásamt 3 prófum sem mældu hreysti úr Test of physical Fitness (TPF) prófabankanum. Eftir hverja þraut voru þátttakendur svo látnir meta eigin getu í þrautunum. Hreyfifærniprófin 4 voru kubbaspjald, kubbaturn, hæll í tá ganga og áttuhlaup. Hreystiprófin voru langstökk, 20m sprettur og 1kg boltakast. Svokallað broskallapróf var notað til að meta sjálfsmat. Niðurstöður: Meginniðurstöður rannsóknarinnar voru að stúlkur voru með hærra sjálfsmat og með marktækan mun í 5 af 7 prófum. Hins vegar voru drengirnir með mun hærri fylgni milli eigin getu og sjálfsmats heldur en stúlkurnar.Ályktanir: Út frá niðurstöðum þá má álykta að stúlkurnar hafi verið með hærra sjálfsmat en drengirnir, en þeir hafi réttara sjálfsmat miðað við árangur í verkefnunum. Hugsanlega má tengja þessar niðurstöður við rannsóknir sem benda til að sjálfsmat drengja endurspeglast frekar af innra ástandi á meðan sjálfsmat stúlkna endurspeglast af endurgjöf og mati annarra.