Að efla sjálfstraust barna og unglinga í gegnum íþróttir

Abstract

Sjálfstraust er mikilvægur þáttur þegar kemur að vellíðan og frammistöðu í íþróttum. Aðalmarkmið rannsóknarinnar var að kanna hvort hægt væri að efla þekkingu stúlkna í hópfimleikum á sjálfstrausti með sjálfstraustsþjálfun og hvort aukin þekking á sjálfstrausti efldi sjálfstraust þeirra. Auk þess er fjallað um reynslu iðkenda, þjálfara og foreldra af sjálfstraustsþjálfun. Þátttakendur í megindlega hluta rannsóknarinnar voru 25 stúlkur á aldrinum 11 til 15 ára sem æfðu hópfimleika. Í upphafi rannsóknar var spurningalisti sem metur sjálfstraust barna og unglinga og mælir þekkingu á sjálfstrausti lagður fyrir þátttakendur. Þjálfari fór í gegnum kerfisbundna sjálfstraustsþjálfun Sportabler „Að efla sjálfstraust í gegnum íþróttir“ með iðkendum á sex mánaða tímabili. Eftir sjálfstraustsþjálfun voru gerðar eftirmælingar og viðtöl tekin við tvo iðkendur, tvo foreldra og þjálfarann. Niðurstöður gáfu vísbendingar um að sjálfstraust og þekking á sjálfstrausti megi efla hjá börnum og unglingum á aldrinum 11 til 15 ára í gegnum skipulagt íþróttastarf með sjálfstraustsþjálfun. Berlega mátti sjá á svörum viðmælenda að sjálfstraustsþjálfunin hefði borið árangur fyrir þá. Niðurstöður rannsóknarinnar gefa því til kynna að þjálfarar geti nýtt sér sjálfstraustsþjálfun Sportabler til að efla sjálfstraust iðkenda sinna sem og þekkingu þeirra og þannig náð fram bættri líkamlegri frammistöðu og aukinni vellíðan iðkenda.Lykilorð: Sjálfstraust – börn - unglingar – íhlutun – fimleikar – þjálfarar / Self-confidence, children, adolescents, intervention, gymnastics, coaches