Samspil bygginga og umhverfis í verkum Alvar Aalto : heildræn hönnun og mannúðleg nálgun í arkitektúr

Abstract

Finnski arkitektinn Alvar Aalto er meðal merkustu arkitekta síðustu aldar. Margir þættir liggja að baki sérstöðu hans. Aalto var afkastamikill og voru hundruð verka byggð eftir teiknistofu hans. Flestar byggingarnar eru staðsettar í Finnlandi en hönnun hans finnst einnig víða annars staðar. Aalto hannaði oft verk inn í náttúrulegt landslag en hann byggði einnig innan borgarmarkanna. Sérstaða Aalto liggur að miklu leyti í því hversu vítt hann leit á arkitektúrfagið. Í ritgerðinni verður fjallað um þrjú ólík verk, Paimio Sanitorium berklaspítalann í skóglendi í suðvestur Finnlandi, Norræna húsið okkar í Vatnsmýrinni og Rautatalo skrifstofubygginguna í Helsinki. Þessi verk Aalto eru ólík og eru byggð á breiðu tímabili í ferli arkitektsins. Engu að síður má sjá samsvörun í verkum hans, hvernig hann mótar hönnunina á heildrænan hátt, frá umhverfisskipulaginu, innra skipulagi og flæði, niður í minnstu smáatriði og útfærslur í innanhúshönnun.